მსახიობ მაშო მელქაძეს სამშობიარო "ტკივილები" სერიალ "ჩემი ცოლის დაქალებში" დაეწყო

მსახიობ მაშო მელქაძეს სამშობიარო "ტკივილები" ჯერ სერიალ "ჩემი ცოლის დაქალებში" დაეწყო, ეკრანზე სერიის გასვლის მეორე დღეს კი რეალურად იმშობიარა და თავის ახალგაჩენილ გოგონას ფილმის მთავარი გმირის სახელი, კატო დაარქვა, უფრო სწორად, მისმა ქმარმა შეარჩია ეს სახელი. მაშო სახლში დიდხანს დარჩენას არ აპირებს, გადასაღებ მოედანს მალე დაუბრუნდება. უფრო მეტიც, ახალ სერიებში პატარა კატოც გამოჩნდება, თუმცა მსახიობმა არ გაგვიმხილა, მისი პატარა გოგონას დედობის ბედნიერება სერიალის რომელ გმირს ერგება.
მაშოს ქმარი ტელეკომპანია "ჯიდიესში" მუშაობს. წლებია სატელევიზიო სივრცეში ტრიალებს, ამიტომ მსახიობი ცოლის კარგად ესმის და ყველანაირად უწყობს ხელს. კატო მისთვის მეორე გოგონაა, პირველი ქორწინებიდანაც ქალიშვილი ჰყავს – თუთიკო. "სარკე" ბედნიერ ცოლ–ქმარს სახლში ესტუმრა და მათი ოჯახური სიხარული გაიზიარა.
მაშო: ჩვენი პატარა 13 მაისს დაიბადა. ფიზიოლოგიურად ვიმშობიარე, გაუტკივარებით. ერთი შკალით რომ ძლიერი ყოფილიყო ტკივილი, ალბათ ვერ გადავრჩებოდი. სულიერი ტრავმა მივიღე. მიკვირს, როგორ მშობიარობენ ქალები, ვინც გაუტკივარებას არ იკეთებენ. ახლა დედას ასჯერ მეტად ვაფასებ.
– ახლა თქვენი ცხოვრება რადიკალურად შეიცვალა. ეს უკვე კარგად გაითავისეთ?
დათო: კი, თუ აქამდე ოჯახში ყველა ვხმაურობდით, ახლა კატოს ცხოვრების რეჟიმს მოვერგეთ. ცვლილებები ყველაფერში იგრძნობა. ყველაზე დიდი ბედნიერებაა, როდესაც ოჯახში ახალი წევრი შემოდის, სხვანაირად იწყებ ცხოვრებას. ორი გოგონა მყავს და დიდ პასუხისმგებლობას ვგრძნობ.
მაშო: ღამე არც ერთს გვძინავს. დათო ძალიან მიფრთხილდება, ბავშვის გაზრდაში მონაწილეობს, გვერდით მიდგას. ცდილობს, რომ სულ სახლში იყოს. 
– თქვენს გოგონას სახელი ერთად შეურჩიეთ?
მაშო: რამდენიმე ვარიანტი გვქონდა. დათომ გადაწყვიტა, რომ კატუშა ყველაზე კარგი იყო და დავარქვით კიდეც.

– მამა მშობიარობის პროცესს დაესწრო?
დათო: დიდი ხნის ფიქრის შემდეგ გადავწყვიტე, მშობიარობას დავსწრებოდი. ბოლო წამამდე სამშობიარო ბლოკში ვიყავი, მაგრამ მერე მივხვდი, რომ მეტი აღარ შემეძლო და სასწრაფოდ გარეთ გამოვედი. მაშოს საშინელი ტკივილები ჰქონდა, მის ყურებას ვერ გავუძელი. მაშომ ივაჟკაცა. ვაღიარებ, რომ სუსტი გამოვდექი.
– მაშო, სერიალში თქვენმა გმირმაც იმშობიარა. რეალურადაც გადასაღებ მოედანზე ხომ არ მიხვდით, რომ კატო იბადებოდა?
მაშო: სერიებს წინასწარ ვიღებთ. ის სერია, სადაც ჩემს გმირს მშობიარობა ეწყება, ეთერში კვირას გავიდა, მეორე დღეს კი ექიმთან ვიზიტი მიწევდა. კლინიკაში რომ მივედი, სანიტრიდან დაწყებული ექიმით დამთავრებული, ყველა გაკვირვებული მიყურებდა, შენ გუშინ იმშობიარე, დღეს აქ რა გინდაო. პაციენტებიც მეუბნებოდნენ, უი, თურმე მართლა ორსულად ყოფილხარო... ექიმმა უკან აღარ გამომიშვა, მამშობიარა. კლინიკაში ყველა თან გადამყვა, ექიმების ყურადღებით დავიღალე.
– კატოს დასახვედრად როგორ მოემზადეთ?
დათო: კატოს ღირსეულად დავხვდით. ძირითადად ჩემი სიდედრი აქტიურობდა, მე კი ნაყიდი ნივთები მომქონდა სახლში. მაშოს დედას სამი შვილიშვილი ჰყავს და ამ საქმეში გამოცდილია. ზუსტად იცოდა, ახალშობილს რა დასჭირდებოდა. მაშო შვიდი თვის ორსული რომ გახდა, პატარასთვის ყველაფერი შევიძინეთ. ამის საფრთხე არ იყო, მაგრამ შვიდთვიანი რომ დაბადებულიყო, გვინდოდა, მომზადებული დავხვედროდით.
– ჭირვეული ორსული ხომ არ იყო თქვენი ცოლი?
დათო: რაღაც დათმობებზე წასვლა მომიწია, თუმცა მაშო ძალიან შეგნებული ადამიანია და ჭირვეული არ ყოფილა. ოქროს თევზი ნამდვილად არ მოუთხოვია.
მაშო: დიდი დიდი, ნაყინი თუ მომინდებოდა. ჩემი მოთხოვნებით არ ვაწუხებდი.
დათო: გართულება ჰქონდა ალკოჰოლის სუნზე, ამიტომ მაქსიმალურად ვცდილობდი, არ დამელია.
– მაშო, გადაღებებზე სიარული არ გიჭირდათ?
მაშო: სამი თვის ორსულს "თავისუფალი თეატრიდან" წამოსვლა მომიწია, ჩემი როლების თამაში შეუძლებელი იყო, რადგან ზოგ სცენაში დავხტოდი. იმედი მაქვს, თეატრში დავბრუნდები. მეგონა, სერიალიდან გამომიშვებდნენ, მაგრამ დამტოვეს და ჩემს გმირს ჩემი მდგომარეობა მიუსადაგეს. ძალიან დიდი მადლობა მათ, რადგან სახლში დაჯდომა ჩემთვის რთული იქნებოდა. კვირაში ერთხელ გადაღებაზე მისვლა კი სირთულეს არ წარმოადგენდა. ფაქტობრივად ძალიან აქტიური ფეხმძიმე ვიყავი, არც მეგობრებთან შეხვედრას ვარიდებდი თავს და არც საქმეს.
– დათო, მსახიობი ქალის ქმრობა ადვილია?
დათო: ჩემთვის რთული არ არის. ტელევიზიაში არ დავბადებულვარ, თორემ იქ გავიზარდე, ამიტომ ეს სფერო ჩემთვის უცხო არ არის. მაშოს პროფესიას ვაფასებ. მსახიობებთან ბევრჯერ მიმუშავია და მათთან თანამშრომლობა სასიამოვნოა. ბოლოს მაშოს ვუთხარი, გადასაღებ მოედანზე არ წახვიდე, მშობიარობა არ დაგეწყოს–მეთქი, რადგან ყოველდღე და ყოველ წამს შვილის მოლოდინში ვიყავით.
მაშო: რა მნიშვნელობა ჰქონდა, მშობიარობა სად დამეწყებოდა, სადაც უნდა ვყოფილიყავი, სამშობიაროში მიმიყვანდნენ.
– მაშო, რამდენ ხანში დაუბრუნდებით გადასაღებ მოედანს?

მაშო: სამშობიაროში ყოფნის დროს ჩემ გვერდით პალატაში ხდებოდა "ჩემი ცოლის დაქალების" ერთ–ერთი სცენის გადაღება. პალატიდან რომ გამოვედი, რეჟისორმა მკითხა, სამსახურში როდის დაბრუნდებიო. ვუპასუხე, თუ საჭიროა, დღესვე–მეთქი. მართლაც დამირეკეს. აქვე გაგიმხელთ, რომ სერიალში ჩემს პატარა კატოსაც იხილავთ.
– ზედმეტი კილოგრამები არ გეტყობათ...
დათო: ორსულობამდე ძალიან გამხდარი იყო, ახლა კი ნორმალური, ქალური პროპორციები აქვს.
მაშო: არადა ისეთი გამხდარიც ძალიან მოვწონდი. 30 კილო მოვიმატე, ადრე 43 კილოგრამი ვიყავი. თავიდან ძალიან ვნერვიულობდი, ფორმები რომ მეცვლებოდა. სარკეში რომ ვიხედებოდი და ვხვდებოდი, მე "მე" აღარ ვიყავი, ხასიათი მეცვლებოდა.
დათო: მაგრამ რომ გაიაზრა, ფეხმძიმედ იყო და ბავშვი უნდა გაეჩინა, მერე აღარ დარდობდა. თავიდან სულ მეწუწუნებოდა, შემხედე, რამხელა გავხდი, როგორ გავსუქდიო. შეძლებისდაგვარად ვაწყნარებდი. ზოგჯერ კი ვეხუმრებოდი, რა არის, რამდენს ჭამ–მეთქი.
მაშო: ღამის 4 საათზე ხან სად წამიყვანდა საჭმელად და ხან – სად. მასზე სამჯერ მეტს ვჭამდი. მეუბნებოდა, ყველაზე ლამაზი ორსული ხარო. ჩემი გარდერობიდან თითქმის ყველაფერი გავაჩუქე, მათ შორის – ფეხსაცმელებიც, მათ რაღას ვერჩოდი, არ ვიცი.
– დათო, როგორც ვიცი, პირველი ქორწინებიდანაც გოგონა გყავთ.
დათო: ჩემი ორივე გოგონა მაისში დაიბადა. თუთიკო 31 მაისს გაჩნდა, კატო – 13 მაისს. კარგი დამთხვევაა – 13–31 მაისი. დები ერთმანეთს ჰგვანან. ყველაზე მნიშვნელოვანი ეტაპი დამიდგა ცხოვრებაში, ორ შვილზე უნდა ვიზრუნო.
მაშო: ადრე ვიყავით წყვილი, ახლა უკვე ოჯახი ვართ. ცხოვრებაში ყველაზე ბედნიერი ეტაპი მაქვს, ამაზე რომ ვფიქრობ, სიხარულისგან მეტირება.
ლანა კიკნაძე